ꢲꢨꢵꢭꢸ ꢭꣃꢒꢵꢱ꣄ ஹபா3லு லௌகாஸ்

ꢥꢪꢱ꣄ꢒꢵꢬ꣄! ꢲꢨꢵꢭꢸ ꢭꣃꢒꢵꢱ꣄ ꢱꢖ꣄ꢔꢬꢶꢫꢾꢡꢾꢥꢸ ꢱꣂꢒꢾꢥꣁ!

ꢢꢷꢥ꣄ ꢣꢶꢥ꣄ꢥꢸ ꢬꢴꢷ ꢦꣁꢮ꣄ꢱ꣄ ꢨꣁꢭꢪ꣄ꢒꢥ꣄ ꢔꢵꢪ꣄ ꢂꢱ꣄ꢒꣁ ꢦꣁꢞꢶ ꢡꢿꢞ꣄ ꢡꢿꢞ꣄ ꢮꢾꢳ꣄ꢮꣂ ꢂꢮ꣄ꢬꢶꢫꢾ ꢒꢳꢫꢿꢱ꣄| ꢌꢭ꣄ꢭꢾꢒꢵꢒ꣄ ꢱꣁꢥ꣄ꢣꢸꢬꢸꢪ꣄ ꢬꢹꢮ꣄ ꢓꢳ꣄ꢳꢶꢫꢾ ꢏꢳꣁ-ꢲꣁꢫꢾ-ꢮꢬꢵ-ꢂꢖ꣄ꢒꢮ꣄ ꢪꢾꢥꢶ ꢪꢾꢳ꣄ꢳꢬꢵꢱ꣄| ꢌꢭ꣄ꢭꢾ ꢒꢸꢬ꣄ꢗ꣄ꢗꢶ ꢮꢬꢵ-ꢦꣁꢮ꣄ꢱ꣄-ꢛꢵꢥꢶ ꢒꣁꢮ꣄ꢞꢵ-ꢒꢸꢨꢸꢬ꣄ ꢒꢵꢫ꣄ ꢪꢾꢥꢬꢵꢱ꣄ ꢪꢾꢥꢾꢡꢶ - 'ꢌꢭ꣄ꢭꢾ ꢏꢳꣁ-ꢲꣁꢫꢾ-ꢮꢬꢵ-ꢂꢖ꣄ꢒꢮ꣄ ꢦꢸꢠ꣄ꢠꢶꢪꢸ ꢢꢷꢥ꣄ ꢣꢶꢥ꣄ꢥꢸ ꢪꢸꢭ꣄ꢭꣁ ꢬꢴꢷ ꢦꢸꢠ꣄ꢠꢶꢪ꣄ ꢪꢸꢱꢾ ꢣꢷ ꢣꢶꢥ꣄ꢥꢸ ꢭꢾꢖ꣄ꢒꢸ ꢬꢴꢵꢫ꣄| ꢣꢶꢱꢥꢶ ꢱꢶꢫꢾꢡ꣄ ꢂꢖ꣄ꢒꢸꢥ꣄ ꢣꢷ ꢣꢶꢥ꣄ꢥꢸ ꢦꣁꢮ꣄ꢱ꣄ ꢨꣁꢭꢪ꣄ꢒꢥ꣄ ꢬꢴꢵꢫ꣄| ꢦꣁꢮ꣄ꢱ꣄ ꢦꣁꢞꢡ꣄ꢡꣁ ꢮꢿꢳꣁ ꢲꢨꢵꢭ꣄ ꢲꢥ꣄ꢣꢵꢬ꣄ꢒꢥ꣄ ꢬꢴꢵꢫ꣄| ꢦꣁꢮ꣄ꢱ꣄ ꢦꣁꢞ꣄ꢥꢵꢡ꣄ꢡꣁ ꢙꢶꢫꢾꢡ꣄ ꢪꢾꢳ꣄ꢳꢶ ꢬꢸꢮ꣄ꢮꣁ ꢲꢥ꣄ꢣꢵꢬ꣄ꢒꢥꢸꢱ꣄ ꢬꢴꢵꢫ꣄| "ꢒꢬꢠ꣄ꢜ꣄" ꢪꢾꢳ꣄ꢳꢶ ꢔꢾꢠ꣄ꢞꢵ ꢣꢵꢥꢸꢒ꣄ ꢙꢵꢬꢶꢫꢾ ꢱꣁꢜ꣄ꢜꢶ ꢏꢠ꣄ꢜꢾꢒ꣄ꢒꢥ꣄ ꢙꢵꢡ꣄ꢡꣁ "ꢗꢵꢥ꣄ꢗ꣄" ꢚꢸꢒꢸ|'

'ꢲꢹꢥꢸꢱ꣄ ꢂꢮ꣄ꢥꢵꢫꢵ?' ꢪꢾꢥꢶ ꢦꢸꢱꢾꢫꢾꢒꣁ, ' ꢱꢸꢬꢶꢡ꣄ ꢩꢵꢬꢵꢜ꣄ ꢂꢮꢾꢡ꣄ ꢲꢹꢥ꣄, ꢲꢸꢙꢵꢳ꣄ ꢣꢾꢒ꣄ꢒꢵꢫ꣄' ꢪꢾꢥꢶ ꢪꢾꢥꢵꢱ꣄|

ꢦꣁꢮ꣄ꢱ꣄ ꢲꢵꢭ꣄ ꢒꢵꢪ꣄ ꢂꢱ꣄ꢒꢶ ꢬꢸꢮ꣄ꢮꣁ ꢪꢥ꣄ꢣꢸ ꢲꣁꢫ꣄ꢫꢶꢬꢿꢱ꣄| ꢒꢵꢪ꣄ ꢒꣂꢥꢒ꣄ ꢙꢵꢬꢾꢱ꣄ ꢪꢾꢥꢶ ꢮꢶꢖ꣄ꢒꢾꢬ꣄ ꢲꣁꢫꢾ ꢪꢴꣁꢜꣁ-ꢩꢸꢬ꣄ꢒꢶꢥꢶ ꢙꣁꢮꢭ꣄ ꢦꢸꢱꢾꢡ꣄, 'ꢪꢶꢜ꣄ꢜꣁ ꢲꢶꢖ꣄ꢔꢾꢡ꣄ ꢒꢾꢜ꣄ꢜꣁ ꢲꢶꢖ꣄ꢔꢸꢮꢵꢫ꣄ ꢪꢾꢥꢶ ꢂꢮ꣄ꢬꢾ ꢒꣃꢳꢵ ꢡꣂꢦ꣄ ꢦꢥꢶꢣꢿꢮ꣄ ꢦꢠ꣄ꢞꢬꢪ꣄ ꢪꢾꢥꢥ꣄| ꢪꢷ ꢪꢶꢜ꣄ꢜꣁ ꢲꢶꢖ꣄ꢔꢸ ꢒꢷ ꢒꢾꢜ꣄ꢜꣁ ꢲꢶꢖ꣄ꢔꢸ ꢒꢷ, ꢱꢸꢬꢶꢡ꣄ ꢩꢬꢵꢜ꣄ ꢂꢮꢾꢡꢷꢱ꣄ ꢦꣁꢥ꣄ꢥꢶ ꢒꢾꢬꢶ ꢡꢵꢡ꣄ ꢭꢪ꣄ꢨꣁ ꢒꢾꢬꢵꢫ꣄| ꢡꢾꢒꣁ ꢧꢭ꣄ꢗꣂꢱ꣄ ꢂꢖ꣄ꢒꣁ ꢥꢶꢪ꣄ꢪꢭ꣄| ꢒꢵꢫ꣄ ꢪꢾꢥꢬꢶꢫꢾ? ꢱꢾꢬ꣄ꢒꢱ꣄ ꢒꢵ?' ꢪꢾꢥꢶ ꢮꢾꢣꢸꢬ꣄ ꢦꢸꢱꢶꢥꢶ ꢦꢸꢱꢬꢵꢱ꣄|

ꢌꢖ꣄ꢒ ꢓꢾꢥꢶ ꢄꢱꢥꢶ ꢪꢾꢥꢾꢡ꣄, ꢱꢵꢳ꣄ꢡꢾꢥꢸ ꢲꣁꢫꢾ ꢭꢴꣁꢮꣁꢪꣁꢡꢶ ꢒꢵꢫ꣄ ꢪꢾꢥꢬꢵꢱ꣄ ꢪꢾꢥꢾꢡꢶ - 'ꢦꣁꢮ꣄ꢱ꣄ ꢥꢴꢷ ꢦꣁꢮ꣄ꢱ꣄ ꢥꢴꢷ ꢪꢾꢥꢶ ꢬꣁꢞ꣄ꢭꢿꢡ꣄ ꢲꣁꢡꢾꢫꢾ| ꢂꢡ꣄ꢡꣁ ꢒꢵꢫ꣄ꢨꢵ ꢪꢾꢥꢾꢡ꣄ ꢚꢫ꣄ꢭꢶ ꢦꣁꢞꢬꢾꢱ꣄| ꢦꢶꢒ꣄ꢒꢾ ꢩꢹꢭ꣄ ꢂꢱ꣄ꢒꢶ ꢥꢛ꣄ꢙꢵꢬꢾꢱ꣄| ꢲꣁꢞꢾ ꢱꢵꢳ꣄ ꢂꢱ꣄ꢒꢶ ꢦꣁꢮ꣄ꢱꢸꢪ꣄ ꢨꢶꢙ꣄ꢙꢶ ꢥꢾꢰ꣄ꢜꢶꢪ꣄ ꢂꢪꢶ ꢱꢿꢡ꣄ꢡꢾ| ꢒꣁꢥ꣄ꢥꢶ ꢱꢖ꣄ꢔꢬꢶꢫꢾ ꢱꣁꢒꢥ꣄ ꢥꢴꢷ'|

ꢄꢱꢥꢶ ꢔꢵꢪ꣄ ꢂꢱ꣄ꢒꣁ ꢪꢾꢥ꣄ꢒ꣄ꢫꢵꢥꢸꢒ꣄ ꢒꢾꢰ꣄ꢜꢪ꣄ ꢮꢿꢥ꣄ ꢲꣁꢫ꣄ꢭꢿꢡ꣄ ꢙꢵꢬꢾꢱ꣄| ꢦꣁꢮ꣄ꢱ꣄ ꢱꢾꢬꢵꢞꢶ ꢦꢶꢞꢸ ꢪꢾꢳ꣄ꢳꢶ ꢦꣁꢞꢶ ꢕꢿꢬ꣄ ꢕꢾꢬꢵꢥ꣄ ꢦꢸꢞ꣄ꢞꢶ ꢙꢿꢞꢬꢿꢱ꣄| "ꢱꢬ꣄ꢒꢵꢬ꣄" ꢒꢵꢫ꣄ ꢒꢾꢬꢡ꣄ꢡꢾ ꢪꢾꢥꢶ ꢒꢳꢥꢵꢡ꣄ꢡꣁ ꢲꢵꢡ꣄ ꢦꢾꢱꢵꢮ꣄ ꢒꢾꢬꢶ ꢣꢾꢒ꣄ꢒꢞꢬꢵꢱ꣄'

ꢌꢭ꣄ꢭꢾꢣꢶ ꢦꢬ꣄ꢮꢥ꣄ ꢥꢴꢷ| ꢦꣁꢮ꣄ꢱꢸꢪ꣄ ꢙꢶꢫꢾꢡ꣄ ꢦꢶꢙ꣄ꢙꢫ꣄ꢫꢵꢫ꣄ ꢪꢾꢥꢶ ꢪꣁꢒꣁ ꢱꣁꢪ꣄ꢨꢸꢳꣁ ꢣꢷꢬꢵꢥꢶ| ꢪꢷ ꢒꣂꢜ꣄ ꢙꢷ ꢬꣁꢞꢸ?

ꢦꣁꢮ꣄ꢱ꣄ ꢱꢸꢜ꣄ꢜꢶ ꢱꢸꢬꢶꢡ꣄ ꢩꢬꢵꢜ꣄ ꢂꢮ꣄ꢥꣁ ꢪꢾꢥꢶ ꢪꢾꢳ꣄ꢳꢶ ꢂꢪꢶ ꢪꢸꢱꢞꢬꢶꢫꢾ|

ꢧꢶꢮ꣄ꢬꢶ ꢱꣁꢥ꣄ꢡꣁ ꢡꢸꢖ꣄ꢒꣁ ꢣꢾꢒ꣄ꢒꢬꢶꢫꢾ ꢭꢾꢖ꣄ꢒꢸ 'ꢱꣂꢒ꣄ ꢂꢮꢾꢡ꣄ ꢦꢥꢶ ꢦꢾꢮꣂ' ꢪꢾꢥꢶ ꢪꢾꢳ꣄ꢳꢶꢒ꣄ꢒꢶꢥ꣄ ꢱꣂꢒꢾꢥꣁ!ꢱꣂꢒꢾꢥꣁ!!ꢱꣂꢒꢾꢥꣁ!!!


நமஸ்கார்! ஹபா3லு லௌகாஸ் ஸங்க3ரியெதெனு ஸோகெனொ!

தீ2ன் தி3ன்னு ரீ: பொவ்ஸ் பொ3லம்கன் கா3ம் அஸ்கொ பொடி3 தேட்3 தேட்3 வெள்வோ அவ்ரியெ களயேஸ்| எல்லெகாக் ஸொந்து3ரும் ரூவ் க2ள்ளியெஒளொ-ஹொயெ-வரா-அங்கவ் மெனி மெள்ளராஸ்| எல்லெ குர்ச்சிவரா-பொவ்ஸ்-ஞானி கொவ்டா3-குபு3ர் காய் மெனராஸ் மெநெதி - 'எல்லெஒளொ-ஹொயெ-வரா-அங்கவ் புண்ணிமு தீ2ன் தி3ன்னு முல்லொ ரீ: புண்ணிம்முஸெ தீ3 தி3ன்னு லெங்கு ரா:ய்| தி3ஸனி ஸியெத் அங்குன் தீ3 தி3ன்னுபொவ்ஸ் பொ3லம்கன் ரா:ய்| பொவ்ஸ் பொட3த்தொ வேளொ ஹபா3ல்ஹந்தா3ர்கன் ரா:ய்| பொவ்ஸ் பொட்3நாத்தொ ஜியெத் மெள்ளி ருவ்வொஹந்தா3ர்கனுஸ் ரா:ய்| "கரண்ட்" மெள்ளி கெ3ண்டா3 தா3னுக் ஜாரியெ ஸொட்டிஒண்டெக்கன் ஜாத்தொ "சான்ச்" ஜு2கு|'

'ஹூனுஸ் அவ்னாயா?' மெனி புஸெயெகொ, ' ஸுரித் பா4ராட் அவெத் ஹூன், ஹுஜாள் தெ3க்காய்' மெனி மெனாஸ்|

பொவ்ஸ் ஹால் காம் அஸ்கி ருவ்வொ மந்து3 ஹொய்யிரேஸ்| காம் கோனக்ஜாரெஸ் மெனி விங்கெர் ஹொயெ மொ:டொ-பு4ர்கினி ஜொவல் புஸெத், 'மிட்டொ ஹிங்கெ3த் கெட்டொ ஹிங்கு3வாய் மெனி அவ்ரெ கௌளா தோப்பநிதே3வ் பண்ட3ரம் மெனன்| மீ மிட்டொ ஹிங்கு3 கீ கெட்டொ ஹிங்கு3 கீ, ஸுரித் ப4ராட் அவெதீஸ் பொன்னி கெரி தாத் லம்பொ3 கெராய்| தெகொப2ல்சோஸ் அங்கொ நிம்மல்| காய் மெனரியெ? ஸெர்கஸ் கா?' மெனி வெது3ர்புஸினி புஸராஸ்|

எங்க கெ2னி இஸனி மெநெத், ஸாள்தெனு ஹொயெ லொ:வொமொதி காய்மெனராஸ் மெநெதி - 'பொவ்ஸ் நீ: பொவ்ஸ் நீ: மெனி ரொட்3லேத் ஹொதெயெ| அத்தொ காய்பா3 மெநெத் ஜ2ய்லி பொட3ரெஸ்| பிக்கெ பூ4ல் அஸ்கி நஞ்ஜாரெஸ்| ஹொடெ3 ஸாள் அஸ்கி பொவ்ஸும் பி3ஜ்ஜி நெஷ்டிம் அமி ஸேத்தெ| கொன்னிஸங்க3ரியெ ஸொகன் நீ:'|

இஸனி கா3ம் அஸ்கொ மென்க்யானுக் கெஷ்டம் வேன் ஹொய்லேத் ஜாரெஸ்| பொவ்ஸ் ஸெராடி3 பிடு3 மெள்ளி பொடி3 கே4ர் கெ4ரான் புட்3டி3 ஜேட3ரேஸ்| "ஸர்கார்" காய் கெரத்தெ மெனி களநாத்தொ ஹாத் பெஸாவ் கெரிதெ3க்கட3ராஸ்'

எல்லெதி3 பர்வன் நீ:| பொவ்ஸும் ஜியெத் பிஜ்ஜய்யாய் மெனி மொகொஸொம்பு3ளொ தீ3ரானி| மீ கோட் ஜீ ரொடு3?

பொவ்ஸ் ஸுட்டி ஸுரித் ப4ராட் அவ்னொ மெனி மெள்ளி அமி முஸட3ரியெ|

பி2வ்ரி ஸொந்தொ துங்கொ தெ3க்கரியெ லெங்கு 'ஸோக் அவெத் பனி பெவோ' மெனி மெள்ளிக்கின் ஸோகெனொ!ஸோகெனொ!!ஸோகெனொ!!!