A story for Dialect Variation

Today, I received a small story (karikannan-muthalakannan) from Shri.O.S.Subramanian and am being asked to translate it to Paramakkudi dialect. The story was in either Trichy or Salem dialect which I am not sure but surely it is not in Madurai dialect which is native of Mr.O.S.Subramanian. The story was sent to few others too. I have provided the story send to me and the version from me (Paramakkudi). Shri. T.N.Krishna moorthi, Paramakkudi native and now in Andaman, also provided the story to Shri.OSS dhaa.

Story Received:

"முல்லா காலம்மு கண்ணாடி ஜுண்ணா. மென்கான் கொன்னி தெங்க தோண் செய்ல்ரித்தெநீ: ஒண்டிதி மெந்தொ காரிக்கண்ணனுகு ஒண்டெ கண்ணாடி அப்பெஸி. தெனா தியோ

சியஸீ. தெமொ தெங்கபா3 ஹொதாஸி. மொரிஜியெ தெகா பா3ஸீ தெமொ சேமெனி ஹவ்டிலேஸி. தெகொ ஒண்டீஸ் சொந்தோஷ். தெகொ தெங்க பா3 ஹொல்லே ஜுக்கு பிரேவ். தெகா

ஹாலு கண்ணாடி கொ2ப்3பி3ம் தெகொ ஜொவலூஸ் தொ2வ்லிடேஸ். இஞ்ஜிரதொ முல்லோ தியொ கண்ணாடிதெள்கட் அடூக் தொவ்லுடை.

காரிக்கண்ணன் பா3ய்லுகு இயே ஆச்சரியம்க ஹொந்தேஸ். ஒண்டிதி காரிகண்ணன் இஞ்சிரதா தெனா கண்ணாடி சீஸ். தெமொ ஒண்டெ பா3ய்ல்மெனிக் ஹொதிஸி. காரிகண்ணன்

ஹொல்லே தெகொ செந்தேவ் அவ்டிஸ். தெகொ செந்தா ஜெடா ஜேடிஸ். “துமி அத்தா ஜுக்கு நஜ்ஜியாஸ். தியே கண்ணாடிம் ஒண்டெ பா3ய்ல்மெனிக் ஸே. தெகுர்ச்சீஸி கண்ணாடி

தும்ஜொவளூஸ் தொவ்ல்ரியாத்தெ. துங்கொ அத்தா மொகொ தெ4ர்னாஜேடிஸ்” மெனி மெனிஸி.

தெகொ காரிகண்ணன் ரெய்லி “அம்பிர் பா3ஸ் தெமொ ஸேத்தெ. தெக்குர்ச்சீஸ் தொவ்ல்ரித்தெ” மெனெஸ். தெனா

“நீ:, நீ:, துமி சொட்ட வத்த சங்கராஸ்” மெனிஸி. காரிகண்ணன் காய் ஸங்கி முள்ளொ தெனோ ஐய்கினி.

தெவ்ளாக் தேட் முதலகண்ணன் அவெஸ். தெனா எங்கொ களைய தென. தெஜொவளு தெனு தீ3தெனு தெங்க குறை மெல்லியாஸி. முதலகண்ணன் கண்ணாடி க2ள்ளி சியெஸி. தெமொ

ஒண்டி பூ4த் ஹொந்தேஸ். “அய்யோ, பூ4த் ! பூ4த் !!” மென் ப4வாட் தைலேத் கண்ணாடி கல்லா தைதேஸ். கண்ணாடி தூள் தூள்க புட்டி ஜேடிஸ்.

தல்லொ பா3ய்ல் ஜெடொ முள்ள தெஸெந்த முஜ்ஜிஸி."

Story that I sent:

ꢪꢸꢭ꣄ꢭꢵ ꢒꢵꢭꢪꢸ ꢒꢠ꣄ꢠꢞꢶ ꢙꢸꢠ꣄ꢠꢵ꣎ ꢪꢾꢥ꣄ꢒ꣄ꢫ꣄ꢫꢵꢥ꣄ ꢒꣁꢥ꣄ꢥꢶ ꢡꢾꢥꢸ ꢡꢾꢖ꣄ꢒ ꢡꣂꢠ꣄ ꢱꢷꢬꢵꢥꢷ꣎ ꢏꢠ꣄ꢜꢾꢡꢶ ꢒꢵꢬꢶꢒꢠ꣄ꢠꢥꢸꢒꢸ ꢏꢠ꣄ꢜꢾ ꢒꢠ꣄ꢠꢞꢶ ꢂꢨ꣄ꢨꢾꢱ꣄꣎ ꢡꢾꢥꣁ ꢡꢾꢭ꣄ꢭꢾ ꢱꢶꢫꢾꢱꢶ꣎ ꢡꢾꢪꢵꢪ꣄ ꢡꢾꢖ꣄ꢒꢨꣁ ꢲꣁꢡ꣄ꢫ꣄ꢫꢵꢱꢶ꣎ ꢪꣁꢬꢶꢙꢶꢫꢾ ꢡꢾꢖ꣄ꢒ

ꢦꣂꢱꢶ ꢡꢾꢪꢵꢪ꣄ ꢱꢿ ꢪꢾꢥꢶ ꢲꢮ꣄ꢜꢶꢭꢶꢫꢾꢱ꣄ ꣎ ꢡꢾꢒꣁ ꢏꢠ꣄ꢜꢾ ꢱꣁꢥ꣄ꢡꣂꢰ꣄꣎ ꢡꢾꢒꣁ ꢡꢾꢖ꣄ꢒ ꢨꢵ ꢲꣁꢳ꣄ꢳꢾ ꢙꢸꢒ꣄ꢒꢸ ꢦ꣄ꢬꢿꢮ꣄꣎ ꢡꢾꢒ ꢲꢵꢭꢶ ꢒꢠ꣄ꢠꢞꢶ ꢓꣁꢨ꣄ꢨꢶꢪꢸ ꢡꢾꢒꣁ ꢙꢮꢭꢹꢱ꣄ ꢢꣁꢮ꣄ꢭꢶꢜꢶꢫꣁ꣎ ꢄꢛ꣄ꢙꢶꢬꢡꣁ ꢪꢾꢳ꣄ꢳꢶ ꢡꢾꢭ꣄ꢭꢾ ꢒꢠ꣄ꢠꢞꢶ ꢡꢾꢳ꣄ꢒꢜ꣄

ꢂꢞꢸꢒ꣄ꢒꢸ ꢢꣁꢮ꣄ꢭꢸꢞꣀ꣏

ꢒꢵꢬꢶꢒꢠ꣄ꢠꢥ꣄ ꢨꢫ꣄ꢭꢸꢒꢸ ꢌꢭ꣄ꢭꢾ ꢃꢗ꣄ꢗꢬꢶꢫꢾꢪ꣄ꢒꢥ꣄ ꢲꣁꢡꢾꢱ꣄꣎ ꢏꢠ꣄ꢜꢾꢡꢶ ꢒꢵꢬꢶꢒꢠ꣄ꢠꢥ꣄ ꢄꢛ꣄ꢙꢶꢬꢡꣁ ꢡꢾꢥꣁ ꢒꢠ꣄ꢠꢞꢶꢪ꣄ ꢱꢷꢱ꣄꣎ ꢡꢾꢪꣁ ꢏꢠ꣄ꢜꢾ ꢨꢫ꣄ꢭ꣄ꢪꢾꢥꢶꢒ꣄ ꢲꣁꢡꢶꢱꢶ꣎ ꢒꢵꢬꢶꢒꢠ꣄ꢠꢥ꣄ ꢲꣁꢳ꣄ꢳꢾ ꢡꣁꢒꣁ ꢱꢥ꣄ꢡꢾꢮ꣄ ꢂꢮ꣄ꢞꢶꢫꣁ꣎ ꢡꢾꢒꣁ ꢱꢾꢬꢵꢜꢶ

ꢚꢾꢞꢵꢒ꣄ ꢙꢿꢞꢶꢒꢶ꣎ "ꢡꢸꢪꢶ ꢂꢡ꣄ꢡꣁ ꢙꢸꢒ꣄ꢒꢸ ꢥꢙ꣄ꢙꢶꢬꢵꢱ꣄꣎ ꢡꢶꢫꢾ ꢒꢠ꣄ꢠꢞꢶꢪ꣄ ꢏꢠ꣄ꢜꢾ ꢨꢫ꣄ꢭ꣄ꢪꢾꢥꢶꢒ꣄ ꢱꢿ꣎ ꢡꢾꢒꢸꢗ꣄ꢗꢷꢱ꣄ ꢒꢠ꣄ꢠꢞꢶ ꢡꢸꢬꢾ ꢭꢾꢔꢸꢡ꣄ꢡꣂꢱ꣄ ꢢꣁꢮ꣄ꢭ꣄ꢬꢶꢫꢾ꣎ ꢡꢸꢖ꣄ꢒꣁ ꢂꢡ꣄ꢡꣁ ꢪꢷ ꢡꢾꢥ꣄ꢥꢵꢡ꣄ꢡꣁ ꢙꢿꢞꢶꢫꣁ" ꢪꢾꢥꢶ ꢪꢾꢥꢶꢱꢶ꣏

ꢡꢾꢒꣁ ꢒꢵꢬꢶꢒꢠ꣄ꢠꢥ꣄ ꢬꢴꢷꢭꢶ, 'ꢂꢮ꣄ꢬꢾ ꢨꣂꢱ꣄ ꢡꢾꢪꢵꢪ꣄ ꢱꢿꢡ꣄ꢡꢾ꣎ ꢡꢾꢒꣁ ꢒꢸꢗ꣄ꢗꢷꢱ꣄ ꢢꣁꢮ꣄ꢭ꣄ꢬꢾꢡ꣄ꢡꢾ" ꢪꢾꢥꢾꢱ꣄ ꢡꢾꢥꣁ꣏

"ꢥꢴꢷ.. ꢥꢴꢷ..ꢡꢸꢪꢶ ꢗꣁꢜ꣄ꢜꣁ ꢮꢡ꣄ꢡꣁ ꢱꢖ꣄ꢒꢬꢵꢱ꣄" ꢪꢾꢥꢶꢱꢶ꣎ ꢒꢵꢬꢶꢒꢠ꣄ꢠꢥ꣄ ꢒꢵꢫ꣄ ꢱꢖ꣄ꢒꢶ ꢪꢾꢳ꣄ꢳꢶ ꢡꢾꢥꣁ ꢎꢒꢶꢥꢶ꣏

ꢡꢿꢮꢿꢳꣁ ꢡꢿꢜ꣄ ꢪꢸꢡꢭꢒꢠ꣄ꢠꢥ꣄ ꢂꢮꢾꢱ꣄꣎ ꢡꢾꢥꣁ ꢌꢖ꣄ꢒꣁ ꢣꢷ ꢡꢾꢖ꣄ꢒꣁ ꢒꢳꢫꢡ꣄ꢡꢾꢥꣁ꣎ ꢡꢿꢙꢮꢭ꣄, ꢡꢾꢥꢸ ꢣꢷꢡꢾꢥꢸ ꢡꢾꢖ꣄ꢒꣁ 'ꢒꢸꢬꣀ' ꢪꢾꢭ꣄ꢭꢶꢫꢵꢱꢶ꣎ ꢪꢸꢡꢭꢒꢠ꣄ꢠꢥ꣄ ꢒꢠ꣄ꢠꢞꢶ ꢓꢳ꣄ꢳꢶ ꢱꢶꢫꢾꢱ꣄꣎ ꢡꢾꢪꢵꢪ꣄ ꢏꢠ꣄ꢜꢾ ꢩꢹꢡ꣄ ꢲꣁꢡꢾꢱ꣄꣎ "ꢎꢫꣂ!

ꢩꢹꢡ꣄! ꢩꢹꢡ꣄!!" ꢪꢾꢥꢶ ꢩꢮꢵꢜ꣄ ꢡꣀꢭꢿꢡ꣄ ꢒꢠ꣄ꢠꢞꢶ ꢓꢭ꣄ꢭꣁ ꢡꣀꢡꢶꢫꣁ꣎ ꢒꢠ꣄ꢠꢞꢶ 'ꢡꢹꢳ꣄ ꢡꢹꢳ꣄' ꢒꢥ꣄ ꢧꢸꢜ꣄ꢜꢶ ꢙꢿꢞꢶꢫꣁ꣎

ꢣꢭ꣄ꢭꣁ ꢨꢫ꣄ꢭ꣄ ꢚꢾꢞꣁ ꢪꢾꢳ꣄ꢳꢶ ꢡꢿꢱꢾꢥ꣄ꢡꣁ ꢪꢸꢙ꣄ꢙꣁ꣎

முல்லா காலமு கண்ணடி3 ஜுண்ணா| மென்க்ய்யான் கொன்னி தெனு தெங்க தோண் ஸீரானீ| ஒண்டெதி காரிகண்ணனுகு ஒண்டெ கண்ணடி3 அப்3பெ3ஸ்| தெனொ தெல்லெ ஸியெஸி|

தெமாம் தெங்கபொ3 ஹொத்ய்யாஸி| மொரிஜியெ தெங்க போஸி தெமாம் ஸே மெனி ஹவ்டிலியெஸ் | தெகொ ஒண்டெ ஸொந்தோஷ்| தெகொ தெங்க பா3 ஹொள்ளெ ஜுக்கு ப்ரேவ்| தெக

ஹாலி கண்ணடி3 கொ2ப்3பி3மு தெகொ ஜவலூஸ் தொ2வ்லிடியொ| இஞ்ஜிரதொ மெள்ளி தெல்லெ கண்ணடி3 தெள்கட் அடு3க்கு தொ2வ்லுடை3||

காரிகண்ணன் ப3ய்லுகு எல்லெ ஆச்சரியெம்கன் ஹொதெஸ்| ஒண்டெதி காரிகண்ணன் இஞ்ஜிரதொ தெனொ கண்ணடி3ம் ஸீஸ்| தெமொ ஒண்டெ ப3ய்ல்மெனிக் ஹொதிஸி| காரிகண்ணன்

ஹொள்ளெ தொகொ ஸந்தெவ் அவ்டி3யொ| தெகொ ஸெராடி ஜெ2டா3க் ஜேடி3கி| "துமி அத்தொ ஜுக்கு நஜ்ஜிராஸ்| தியெ கண்ணடி3ம் ஒண்டெ ப3ய்ல்மெனிக் ஸே| தெகுச்சீஸ் கண்ணடி3

துரெ லெகு3த்தோஸ் தொ2வ்ல்ரியெ| துங்கொ அத்தொ மீ தென்நாத்தொ ஜேடி3யொ" மெனி மெனிஸி||

தெகொ காரிகண்ணன் ரீ:லி, 'அவ்ரெ போ3ஸ் தெமாம் ஸேத்தெ| தெகொ குச்சீஸ் தொ2வ்ல்ரெத்தெ" மெனெஸ் தெனொ||

"நீ:.. நீ:..துமி சொட்டொ வத்தொ ஸங்கராஸ்" மெனிஸி| காரிகண்ணன் காய் ஸங்கி மெள்ளி தெனொ ஐகினி||

தேவேளொ தேட் முதலகண்ணன் அவெஸ்| தெனொ எங்கொ தீ3 தெங்கொ களயத்தெனொ| தேஜவல், தெனு தீ3தெனு தெங்கொ 'குரை' மெல்லியாஸி| முதலகண்ணன் கண்ணடி3 க2ள்ளி

ஸியெஸ்| தெமாம் ஒண்டெ பூ4த் ஹொதெஸ்| "ஐயோ! பூ4த்! பூ4த்!!" மெனி ப4வாட் தைலேத் கண்ணடி3 க2ல்லொ தைதியொ| கண்ணடி3 'தூள் தூள்' கன் பு2ட்டி ஜேடி3யொ|

த3ல்லொ ப3ய்ல் ஜெ2டொ3 மெள்ளி தேஸெந்தொ முஜ்ஜொ|

ꢩꢹꢒ꣄ - பூ4க்

ꢡꢿ ꢣꢶꢥ꣄ꢥꢸ ꢲꢹꢥ꣄ ꢗꢵꢜꣁ ꢱꣂꢥ꣄ ꢲꢥ꣄ꢭꢿꢡ꣄ ꢲꣁꢡꢾꢱ꣄꣎ ꢲꢸꢥꢳꣁ ꢲꣁꢫꢾ ꢲꢵꢭ꣄, ꢦꢥꢶ ꢒꢾꢰ꣄ꢜꢪ꣄ ꢪꢾꢳ꣄ꢳꢶ ꢗꢾꢬ꣄ꢭꢶꢞꢶꢫꣁ꣎ ꢡꢿ ꢱꢸꢥꢵꢒ꣄ ꢣꢷ ꢣꢶꢥ꣄ꢥꢸ ꢬꢴꢷ ꢩꢵꢡ꣄ ꢂꢨ꣄ꢨꢸꢥꢵꢡ꣄ꢡꣁ ꢤꢮ꣄ꢬꣁ ꢱꣁꢪ꣄ꢪꢬꢹꢱ꣄ ꢨꢶꢱꢶ ꢲꣁꢡꢾꢱ꣄| ꢦꣂꢜ꣄ ꢂꢱ꣄ꢒꣁ ꢩꢹꢒ꣄; ꢪꣁꢥ꣄ꢥꢸ ꢂꢱ꣄ꢒꣁ ꢩꢵꢡ꣄꣎ ꢬꢴꢶꢫꢾꢡ꣄ ꢪꢾꢳ꣄ꢳꢶ ꢲꢸꢜꢶ ꢙꢷ ꢮꢾꢒ꣄ꢒꢸꢥꣁ ꢪꢾꢥꢶ ꢭꢔꢾꢥꢶ꣎ ꢨꢶꢱꢶꢬꢶ 'ꢩꢹꢒ꣄ ꢩꢹꢒ꣄' ꢪꢾꢥꢶ ꢲꢮ꣄ꢜꢶꢭꢿꢡ꣄ ꢲꣁꢡꢾꢱ꣄꣎

ꢲꢮ꣄ꢜꢥ꣄ ꢩꢹꢒ꣄ ꢙꢮꢞꢫ꣄ ꢒꢵ? ꢡꢾꢭ꣄ꢭꢾ ꢡꢿ ꢱꢸꢥꢵꢒ꣄ ꢒꣁꢥ꣄ꢥꢶ ꢱꢶꢒ꣄ꢒꢞꢶ ꢣꢷꢬꢵꢥꢵꢥ꣄ ꢱꣂꢥ꣄ ꢱꢿ꣎ ꢗꢵꢬ꣄ꢦꢵꢫꢶꢥ꣄ ꢗꢾꢮ꣄ꢣꢸꢥꣁ ꢪꢾꢥꢶ ꢥꢴꢷꢥꢵ꣎ ꢡꢾꢒꣁ ꢲꢵꢳ꣄ ꢒꣁꢥ꣄ꢥꢶ ꢡꢾꢥꢸ ꢱꢶꢒ꣄ꢒꢞꢶ ꢤꢷꢬꢵꢥꢶ꣎꣎

ꢩꢹꢒ꣄ ꢔꣂꢱ꣄ ꢱꣁꢞꢫ꣄ ꢒꢵ? ꢱꢸꢥꢵꢒ꣄ ꢲꢸꢞꢶ ꢲꢶꢨ꣄ꢨꢶ ꢬꢴꢮꢜ꣄ꢜꢶꢫꣁ꣎ ꢩꢵꢡ꣄ ꢓꢵꢥꢵꢙꢶꢫꢾꢡ꣄ ꢪꣁꢬꢠꢹꢱ꣄ ꢪꢾꢥꢶ ꢲꢮ꣄ꢜꢶ ꢮꢷꢢꢸ ꢮꢷꢢꢸ ꢱꢸꢜ꣄ꢜꢸ ꢧꢶꢬ꣄ꢭꢿꢡ꣄ ꢲꣁꢡꢿꢱ꣄꣎ ꢡꢾꢥ꣄ꢣꢹꢣꢷ ꢒꢵꢫ꣄ ꢮꢶꢰꢿꢱ꣄ ꢪꢾꢥꢶ ꢒꢳꢵꢥꢶ꣎ ꢔꢵꢪ꣄ ꢂꢱ꣄ꢒꣁ ꢨꣁꢠꢵꢭ꣄ ꢱꣁꢞ꣄ꢭꢿꢡ꣄ ꢲꣁꢡ꣄ꢫ꣄ꢫꢵꢱ꣄꣎ ꢱꢸꢥꢵꢒ꣄ ꢩꢹꢒ꣄ ꢏꢠ꣄ꢜꢾ ꢦꣁꢒ꣄ꢒꣁ ꢪꢾꢥꢾꢡ꣄, ꢨꣁꢠꢵꢭ꣄ ꢱꢷꢣꢶ ꢤꢵꢒ꣄ ꢏꢠ꣄ꢜꢾ ꢦꣁꢒ꣄ꢒꣁ꣎꣎

ꢏꢠ꣄ꢜꢾ ꢕꣁꢪ꣄ꢪꣁ ꢮꢾꢣꢹꢬ꣄ ꢲꢸꢜ꣄ꢜꣁ ꢦꢵꢥ꣄ ꢲꢸꢱꢶꢬꢶ ꢣꢔꢶ ꢲꣁꢡ꣄ꢫ꣄ꢫꢵꢱ꣄꣎ ꢱꢸꢥꣁ ꢱꣁꢥ꣄ꢡꣂꢰ꣄ꢒꢥ꣄ ꢓꢵꢥ꣄ ꢙꢵꢥ꣄ ꢮꢿꢳꣁ, ꢒꣂꢜ꣄ ꢬꢴꢷ ꢂꢮꢾꢫꢾ ꢪꢾꢥꢶ ꢒꢳꢵꢥꢶ, ꢢꢷꢥ꣄ ꢗꢵꢬ꣄ ꢱꢸꢥꢵꢥ꣄ ꢡꢿꢜ꣄ ꢗꢾꢬ꣄ꢭꢶꢞꢶꢫꢵ꣎ ꢂꢮ꣄ꢬꢾ ꢱꢸꢥꢵꢒ꣄ ꢙꢾꢜꣁ ꢪꢭ꣄ꢭꢶ ꢓꢵꢡ꣄ꢡꣁ ꢨꣁꢭꢪ꣄ ꢥꢴꢷ꣎ ꢣꢸꢱꢶꢬꢾ ꢒꣂꢜ꣄ ꢡꢶ ꢒꢵꢫ꣄ ꢡꢶ ꢂꢨ꣄ꢨꢫ꣄ ꢒꢵ ꢪꢾꢥꢶ ꢮꢾꢒ꣄ꢒꢥ꣄ ꢥꢶꢳ꣄ꢳꢶꢞꢶꢫꣁ꣎꣎

ꢡꢾꢭ꣄ꢭꢾ ꢮꢷꢢꢸ ꢪꢸꢒ꣄ꢒꢸꢬ꣄ ꢱꢿꢡ꣄ꢡꢾ ꢪꢡ꣄ꢡꢶꢪ꣄, ꢏꢠ꣄ꢜꢾ ꢱꢸꢒ꣄ꢒꢾ ꢲꢜ꣄ꢒꢵ ꢒꢸꢜ꣄ꢒꣁ ꢱꢷꢡꢶ ꢱꣁꢥ꣄ꢡꣁꢰ꣄ꢒꢥ꣄ ꢓꢵꢡ꣄ꢡꣁ ꢙꢶꢫꢾꢱ꣄꣎ ꢲꢜ꣄ꢒꣁ ꢗꢮꢡ꣄ꢡꣁ ꢗꢮꢡ꣄ꢡꣁ, ꢡꣂꢠꢸ ꢩꢶꢡ꣄ꢡꢬ꣄ ꢱꢿꢡ꣄ꢡꢾ ꢒꢾꢠ꣄ꢜꣁ ꢧꢜ꣄ꢜꢶ, ꢬꢾꢒꢡ꣄ ꢂꢮꢡ꣄ꢡꣁ ꢥꢶꢳ꣄ꢳꢶꢞꢶꢫꣁ꣎ ꢡꢾꢭ꣄ꢭꢾ ꢬꢾꢒꢡ꣄ ꢲꢜ꣄ꢒꢵꢪ꣄ ꢬꢴꢷ ꢂꢮꢬꢿꢱ꣄ ꢪꢾꢥꢶ ꢲꢮ꣄ꢜꢶ, ꢩꢾꢳꢶ ꢱꣁꢪ꣄ꢦꢸꢒꢥ꣄ ꢓꢵꢡ꣄ꢡꣁ ꢥꢶꢳ꣄ꢳꢶꢞꢶꢫꣁ ꢡꢾꢭ꣄ꢭꢾ ꢱꢸꢥꣁ꣎꣎

தே தி3ன்னு ஹூன் சாடொ ஸோன் ஹன்லேத் ஹொதெஸ்| ஹுனளொ ஹொயெ ஹால், பனி கெஷ்டம் மெள்ளி செர்லிடி3யொ| தே ஸுனாக் தீ3 தி3ன்னு ரீ: பா4த் அப்3பு3நாத்தொ த4வ்ரொ ஸொம்மரூஸ் பி3ஸி ஹொதெஸ்| போட் அஸ்கொ பூ4க்; மொன்னு அஸ்கொ பா4த்| ரி:யெத் மெள்ளி ஹுடி ஜீ வெக்குனொ மெனி லகெ3னி| பி3ஸிரி 'பூ4க் பூ4க்' மெனி ஹவ்டிலேத் ஹொதெஸ்|

ஹவ்டன் பூ4க் ஜவட3ய் கா? தெல்லெ தே ஸுனாக் கொன்னி ஸிக்கடி3 தீ3ரானான் ஸோன் ஸே| சார்பாயின் செவ்து3னொ மெனி நீ:னா| தெகொ ஹாள் கொன்னி தெனு ஸிக்கடி3 தீ4ரானி||

பூ4க் கோ3ஸ் ஸொட3ய் கா? ஸுனாக் ஹுடி3 ஹிப்3பி3 ர:வட்டியொ| பா4த் கா2னாஜியெத் மொரணூஸ் மெனி ஹவ்டி வீது2 வீது2 ஸுட்டு பி2ர்லேத் ஹொதேஸ்| தெந்தூ3தீ3 காய் விஷேஸ் மெனி களானி| கா3ம் அஸ்கொ பொ3ணால் ஸொட்3லேத் ஹொத்ய்யாஸ்| ஸுனாக் பூ4க் ஒண்டெ பொக்கொ மெநெத், பொ3ணால் ஸீதி3 தா4க் ஒண்டெ பொக்கொ||

ஒண்டெ கொ4ம்மொ வெதூ3ர் ஹுட்டொ பான் ஹுஸிரி த3கி3 ஹொத்ய்யாஸ்| ஸுனொ ஸொந்தோஷ்கன் கா2ன் ஜான் வேளொ, கோட் ரீ: அவெயெ மெனி களானி, தீ2ன் சார் ஸுனான் தேட் செர்லிடி3யா| அவ்ரெ ஸுனாக் ஜெடொ மல்லி கா2த்தொ பொ3லம் நீ:| து3ஸிரெ கோட் தி காய் தி அப்3ப3ய் கா மெனி வெக்கன் நிள்ளிடி3யொ||

தெல்லெ வீது2 முக்குர் ஸேத்தெ மத்திம், ஒண்டெ ஸுக்கெ ஹட்கா குட்கொ ஸீதி ஸொந்தொஷ்கன் கா2த்தொ ஜியெஸ்| ஹட்கொ சவத்தொ சவத்தொ, தோணு பி4த்தர் ஸேத்தெ கெண்டொ ப2ட்டி, ரெகத் அவத்தொ நிள்ளிடி3யொ| தெல்லெ ரெகத் ஹட்காம் ரீ: அவரேஸ் மெனி ஹவ்டி, பெ4ளி ஸொம்புகன் கா2த்தொ நிள்ளிடி3யொ தெல்லெ ஸுனொ||

ꢒꢵꢪ꣄ꢒꢾꢡ꣄ꢡꣁ - ꢒꢵꢱ꣄ꢒꢾꢡ꣄ꢡꣁ காம்கெத்தொ - காஸ்கெத்தொ

ꢌꢭ꣄ꢭꢾ ꢪꢷ ꢓꣁꢨ꣄ꢨꢫꢷ ꢎꢒꢾ ꢓꢾꢥꢶ꣎

ꢏꢠ꣄ꢜꢾ ꢨꢾꢜ꣄ꢒꢵꢒ꣄, ꢒꢵꢪ꣄ꢒꢾꢡ꣄ꢡꣁ, ꢲꣁꢬꢵꢞꢸꢒ꣄ ꢨꢾꢜ꣄ꢒꢶ ꢱꢶꢭꢿꢡ꣄ ꢲꣁꢡ꣄ꢫ꣄ꢫꢵꢱ꣄꣎ ꢨꢾꢜ꣄ꢒꢵꢒ꣄ ꢒꢵꢱ꣄ ꢪꢾꢥꢾꢡ꣄ ꢬꢸꢮ꣄ꢮꣁ ꢃꢱ꣄ꢡꣁ꣎ ꢏꢠ꣄ꢜꢾ ꢒꢵꢱ꣄ꢒꢾꢡ꣄ꢡꣁ ꢡꢾꢒꣁ ꢨꢾꢜꢶꢥꢸꢒ꣄ ꢨꢾꢜ꣄ꢒꣁ ꢮꢾꢒ꣄ꢒꢬꢶꢫꢾ ꢪꢾꢥꢶ ꢎꢒꢶꢥꢶ ꢦꣁꢜꢶ, ꢡꢾꢖ꣄ꢒꣁ ꢕꢿꢬ꣄ ꢂꢮ꣄ꢬꢾ ꢨꢾꢜ꣄ꢒꣁ ꢂꢪ꣄ꢨꣂ, ꢨꣂ ꢂꢱ꣄ꢒꢶꢡꢾꢖ꣄ꢒꣁ ꢨꣁꢭ꣄ꢭꢷ ꢙꢶꢫꢾꢱ꣄꣎ ꢕꢿꢬ꣄ ꢪꣁꢜ꣄ꢜꣁ ꢲꣁꢡꢾꢱ꣄꣎꣎

ꢂꢮ꣄ꢬꢾ ꢨꢾꢜ꣄ꢒꢵ ꢕꢿꢬ꣄ꢡꢾꢥꢸ ꢒꢵꢱ꣄ꢒꢾꢡ꣄ꢡꣁ ꢙꣂꢭ꣄ ꢨꢾꢜ꣄ꢒꣁ ꢒꢵꢫ꣄ ꢒꢵꢪ꣄ ꢒꢾꢬꢬꢾꢡ꣄ꢡꢾ, ꢒꢵꢱ꣄ ꢄꢒ꣄ꢒꣁ ꢱꢿꢡ꣄ꢡꢾ, ꢌꢭ꣄ꢭꢾ-ꢡꢾꢭ꣄ꢭꢾ ꢪꢾꢥꢶ ꢂꢱ꣄ꢒꢶ ꢱꢖ꣄ꢔ꣄ꢫ꣄ꢫꢵꢱ꣄꣎ ꢒꢵꢱ꣄ꢒꢾꢡ꣄ꢡꢵꢒ꣄ ꢨꢾꢜ꣄ꢒꢵ ꢕꢿꢬ꣄ ꢒꢾꢬꢶꢥ꣄ "ꢱꢾꢬ꣄ꢒꣁ" ꢂꢮꢥ꣄ ꢪꢾꢥꢶ ꢭꢔꢾꢱ꣄꣎ ꢏꢠ꣄ꢜꢾ ꢮꢵꢜ꣄ꢒꢥ꣄, ꢬꢸꢮ꣄ꢮꣁ ꢕꢾꢞꢶ ꢙꢶꢫꢾꢡ꣄ꢡꢾꢬ꣄ ꢲꢥ꣄ꢥꢮ꣄, ꢱꣁꢪ꣄ꢪꢸ ꢤꢾꢬꢶ ꢮꢡ꣄ꢡꣁ ꢒꢾꢬꢾꢡ꣄ꢡꣁ ꢥꢶꢭ꣄ꢫ꣄ꢫꢵꢱ꣄꣎ ꢒꢵꢱ꣄ꢒꢾꢡ꣄ꢡꣁ ꢄꢱꢥꢶ ꢱꢖ꣄ꢔꢾꢱ꣄ -

'ꢪꣁꢫ꣄ꢬꢾ ꢥꢴꢥ꣄ꢥꣁ ꢨꢾꢜꢶꢒ꣄ ꣒꣕ ꢏꢬ꣄ꢱꢸ꣎ ꢡꢾꢒꣁ ꣒꣕ ꢦꢮꢸꢥ꣄ ꢱꢾꢥ꣄ꢡꣁ ꢗꢵꢬꢾꢒ꣄ꢒꢸꢬ꣄ ꢨꣁꢠ꣄ꢞꢶ (Car) ꢏꢠ꣄ꢜꢾ ꢣꢾꢮ꣄ꢮꢵꢫ꣄ ꢪꢾꢥꢶ ꢱꢿꢡ꣄ꢡꢾ꣎ ꢧꢷꢬ꣄ ꢏꢠ꣄ꢜꢾ ꢨꢾꢜꢶꢒ꣄ ꣓꣐꣎ ꢡꢾꢒꣁ ꣕꣐ ꢦꢮꢸꢥ꣄ ꢱꢾꢥ꣄ꢡꣁ ꢗꢵꢬꢾꢒ꣄ꢒꢸꢬ꣄ ꢨꣁꢠ꣄ꢞꢶ, ꢏꢠ꣄ꢜꢾ ꢭꢾꢒ꣄ꢒꢸ ꢒꢵꢱ꣄ ꢣꢾꢮ꣄ꢮꢵꢫ꣄ ꢪꢾꢥꢶ ꢱꢿꢡ꣄ꢡꢾ꣎ ꢡꢾꢖ꣄ꢒꣁ ꢨꢾꢫ꣄ ꣓꣕ ꢏꢬ꣄ꢱꢸ ꢲꣂꢬꢾꢱ꣄; ꢡꢾꢒꣁ ꢪꢾꢳ꣄ꢳꢶ ꢨꢾꢜ꣄ꢒꣁ ꢱꢶꢭꢿꢡ꣄ ꢱꢿꢡ꣄ꢡꢾ; ꢣꢶꢮ꣄ꢮꣁ ꢨꢾꢜꢶꢒ꣄ ꢣꢿꢬꢶꢫ꣄ ꢱꢾꢬꢵꢞꢶ ꣒꣕ ꢦꢮꢸꢥ꣄ ꢣꢾꢮ꣄ꢮꢵꢫ꣄ ꢪꢾꢥꢶ ꢱꢵꢬꢶꢫꢾ'꣎꣎

ꢌꢭ꣄ꢭꢾ ꢎꢒꢶꢭꢿꢡ꣄ ꢲꣁꢡꢾ ꢂꢮ꣄ꢬꢾ ꢨꢾꢜ꣄ꢒꣁ ꢚꢸꢒ꣄ꢒꢸ ꢱꣁꢥ꣄ꢡꣂꢯ꣄ꢒꢥ꣄ - 'ꢡꢸꢖ꣄ꢒꣁ ꣔꣐ ꢏꢬ꣄ꢱꢸꢪ꣄ ꢨꢾꢜꢶ ꢱꢿꢫꢵ?' ꢪꢾꢥꢶ ꢦꢸꢱꢾꢱ꣄꣎꣎

எல்லெ மீ கொ2ப்3ப3யீ ஐகெ கெ2னி|

ஒண்டெ பெ3ட்காக், காம்கெத்தொ, ஹொராடு3க் பெ3ட்கி ஸிலேத் ஹொத்ய்யாஸ்| பெ3ட்காக் காஸ் மெநெத் ருவ்வொ ஆஸ்தொ| ஒண்டெ காஸ்கெத்தொ தெகொ பெ3டினுக் பெ3ட்கொ வெக்கரியெ மெனி ஐகினி பொடி, தெங்கொ கே4ர் அவ்ரெ பெ3ட்கொ அம்போ3, போ3 அஸ்கிதெங்கொ பொ3ல்லீ ஜியெஸ்| கே4ர் மொட்டொ ஹொதெஸ்||

அவ்ரெ பெ3ட்கா கே4ர்தெனு காஸ்கெத்தொ ஜோல் பெ3ட்கொ காய் காம் கெரரெத்தெ, காஸ் இக்கொ ஸேத்தெ, எல்லெ-தெல்லெ மெனி அஸ்கி ஸங்க்3ய்யாஸ்| காஸ்கெத்தாக் பெ3ட்கா கே4ர் கெரின் "ஸெர்கொ" அவன் மெனி லகெ3ஸ்| ஒண்டெ வாட்கன், ருவ்வொ கெ4டி3 ஜியெத்தெர் ஹன்னவ், ஸொம்மு தெ4ரி வத்தொ கெரெத்தொ நில்ய்யாஸ்| காஸ்கெத்தொ இஸனி ஸங்கெ3ஸ் -

'மொய்ரெ ந:ன்னொ பெ3டிக் 25 ஒர்ஸு| தெகொ 25 பவுன் ஸெந்தொ சாரெக்குர் பொ3ண்டி3 (Car) ஒண்டெ தெ3வ்வாய் மெனி ஸேத்தெ| பீ2ர் ஒண்டெ பெ3டிக் 30| தெகொ 50 பவுன் ஸெந்தொ சாரெக்குர் பொ3ண்டி3, ஒண்டெ லெக்கு காஸ் தெ3வ்வாய் மெனி ஸேத்தெ| தெங்கொ பெ3ய் 35 ஒர்ஸு ஹோரெஸ்; தெகொ மெள்ளி பெ3ட்கொ ஸிலேத் ஸேத்தெ; தி3வ்வொ பெ3டிக் தே3ரிய் ஸெராடி3 25 பவுன் தெ3வ்வாய் மெனி ஸாரியெ'||

எல்லெ ஐகிலேத் ஹொதெ அவ்ரெ பெ3ட்கொ ஜு2க்கு ஸொந்தோஶ்கன் - 'துங்கொ 40 ஒர்ஸும் பெ3டி ஸேயா?' மெனி புஸெஸ்||