ꢆꢛ꣄ꢗꣁ ꢙꢶꢫꢾ ꢲꢨꢵꢳ꣄ - உஞ்சொ ஜியெ ஹபா3ள்

ꢚꢸꢒꢸ ꢚꢸꢒꢸ ꢏꢬ꣄ꢱꢸ ꢪꢸꢭ꣄ꢭꣁ ꢲꢦꢵꢳ꣄ ꢓꢵꢭ꣄ ꢲꣁꢡꢾꢡ꣄ꢡꢾ꣎ ꢩꢹꢫ꣄ꢥ꣄ꢒꢶꢥ꣄ ꢲꢦꢵꢳꢸ ꢪꢴꢣ꣄ꢣꢶꢪ꣄ ꢥꢴꢥ꣄ꢥꣁ ꢢꢵꢪꢸꢱ꣄ ꢲꣁꢡꢾ ꢲꢵꢭ꣄ ꢪꢾꢥ꣄ꢒ꣄ꢫꢵꢥ꣄ ꢲꢵꢭ꣄ ꢲꢶꢦ꣄ꢦꢶ ꢬꢴꢮꢵꢥꢵ꣎ ꢘꢭ꣄ꢥꣁ ꢪꢾꢥꢾꢡ꣄ ꢒꢵꢫ꣄, ꢒꣂꢜ꣄ꢜꢶ ꢙꢥꣁ ꢪꢾꢥꢾꢡ꣄ ꢒꢵꢫ꣄ ꢂꢱ꣄ꢒꢶꢡꢾꢥꢸ ꢏꢖ꣄ꢔꢶꢬꢷꢱ꣄ ꢙꢥꣁ꣎ ꢙꢶꢡ꣄ꢡꢸꢬꢮ꣄ ꢚꢸꢒ꣄ꢒꢸ ꢒꢾꢰ꣄ꢜꢪ꣄ꢒꢥ꣄ ꢙꢶꢭꢿꢡ꣄ ꢲꣁꢡꢾꢱ꣄꣎꣎

ꢏꢠ꣄ꢜꢾ ꢣꢶꢥ꣄ꢥꢸ ꢏꢠ꣄ꢜꢾ ꢣꣁꢮ꣄ꢬꢶ ꢮꢷꢡ꣄ ꢣꣁꢨ꣄ꢨꢡ꣄ꢡꣁ ꢚꢠ꣄ꢠꢶ ꢓꢳ꣄ꢳꢶ ꢩꢬꢵꢜ꣄ ꢂꢮ꣄ꢫ꣄ꢫꢵꢱ꣄꣎ ꢡꢾꢭ꣄ꢭꢾ ꢕꢾꢠ꣄ꢜꣁ ꢮꢬꣁ ꢨꣁꢭꢪ꣄ꢒꢥ꣄ ꢲꢥ꣄ꢭꢿꢡ꣄ ꢲꣁꢡꢾꢱ꣄꣎ ꢣꣁꢮ꣄ꢬꢶ ꢏꢖ꣄ꢔꢶꢬꢶ ꢣꣁꢨ꣄ꢨꢡ꣄ꢡꣁ ꢚꢸꢒ꣄ꢒꢸ ꢱꢶꢬꢪ꣄ ꢒꢾꢬ꣄ꢭꢶꢞꢶꢫꢵ꣎ ꢣꣁꢨ꣄ꢨꢡ꣄ꢡꣁ ꢮꢿꢳ꣄ ꢮꢬꣁ ꢂꢮꢶ ꢱꢮ꣄ꢳꣁ ꢌꢥ꣄ꢒꢸꢜ꣄ ꢡꢾꢥ꣄ꢒꢸꢜ꣄ ꢲꢸꢜꢜꢿꢱ꣄꣎ ꢣꣁꢮ꣄ꢬꢶꢒ꣄ ꢲꢶꢪ꣄ꢱꣁꢒꢥ꣄ ꢭꢔꢾꢱ꣄꣎ ꢮꢷꢡ꣄ ꢣꣁꢨ꣄ꢨꢡ꣄ꢡꢾ ꢒꢷ? ꢱꢮ꣄ꢳꣁ ꢱꢾꢬ꣄ꢒꣁ ꢒꢾꢬ꣄ꢭꢡ꣄ꢡꢾ?

ꢒꢵꢫ꣄ ꢲꣁꢫꢾꢡ꣄ꢡꢾ ꢒꢷ? ꢒꢵꢫ꣄ ꢲꢮ꣄ꢜꢾꢫꢾ ꢒꢷ -'ꢂꢬꢿ ꢲꢦꢵꢳꢵ! ꢏꢠ꣄ꢜꢾ ꢒꢵꢪ꣄ ꢒꢾꢬꢡ꣄ꢡꣁ ꢡꢹ ꢱꣁꢞꢬꢿꢱ꣄ ꢒꢵ? ꢒꢵꢪ꣄ ꢒꢾꢬ꣄ꢥꢵꢙꢶꢫꢾꢡ꣄ ꢪꢸꢭ꣄ꢭꣁ(ꢪꢾꢳ꣄ꢳꢶ) ꢒꢵꢪ꣄ ꢓꢳ꣄ꢥꢵꢡ꣄ꢡꣁ ꢬꢴꢮꢵꢥꢫꢵ? ꢪꣁꢒꣁ ꢂꢮꢬꢶꢫꢾ ꢬꢵꢒꢸꢪ꣄, ꢂꢡ꣄ꢡꣁ ꢡꢹ ꢆꢛ꣄ꢗꣁ ꢙꢵꢱ꣄ ꢒꢷ ꢥꢴꢷꢙꢾꢡ꣄ ꢚꢠ꣄ꢠꢶ ꢓꢳ꣄ꢳꢶ ꢲꢥꢡ꣄ꢡꢾ?' ꢪꢾꢥꢶ ꢪꢾꢭ꣄ꢭꢿꢡ꣄ ꢣꣁꢮ꣄ꢬꢶ ꢬꢵꢒꢸꢪ꣄ ꢲꢶꢦ꣄ꢦꢶ ꢬꢴꢵꢡ꣄ꢡꣁ ꢥꢶꢭ꣄ꢫ꣄ꢫꢵꢱ꣄꣎ ꢄꢒ꣄ꢒꣁ ꢣꢶꢥ꣄ꢥꢸ ꢓꢭ꣄ꢭꣁ ꢲꣁꢡꢾ ꢲꢦꢵꢳ꣄ ꢂꢡ꣄ꢡ꣄ꢦ꣄ ꢓꢭ꣄ꢭꣁ ꢥꢴꢷ! ꢆꢛ꣄ꢗꣁ ꢙꢿꢞꢶ ꢲꣁꢡꢾꢱ꣄!!

ꢣꣁꢮ꣄ꢬꢶ ꢱꣁꢥ꣄ꢡꣂꢯ꣄ꢒꢥ꣄ ꢮꢷꢡ꣄ ꢣꣁꢨ꣄ꢨꢶꢡꢶ ꢕꣁꢪ꣄ꢪꣁ ꢙꢿꢞ꣄ꢫꢵꢱ꣄꣎꣎

ꢄꢱꢥꢷꢱ꣄ ꢂꢪꢶ ꢱꢵꢬꢶꢫꢾ ꢌꢭ꣄ꢭꢾ ꢲꢦꢵꢳ꣄ ꢆꢛ꣄ꢗꣁ ꢙꢶꢫꢾꢡ꣄ꢡꢾ꣎ ꢡꢾꢭ꣄ꢭꢾ ꢣꣁꢮ꣄ꢬꢶ ꢏꢥ꣄ꢜꢾ ꢬꢴꢵꢥꢙꢾꢡ꣄ ꢂꢡ꣄ꢡꣁ ꢂꢪꢶ ꢒꣂꢥꢒ꣄ ꢬꢴꢷꢬꢵꢮ꣄ꢮꢾ?

ஜு2கு ஜு2கு ஒர்ஸு முல்லொ ஹபாள் கா2ல் ஹொதெத்தெ| பூ4ய்ன்கின் ஹபாளு ம:த்3தி3ம் ந:ன்னொ தா2முஸ் ஹொதெ ஹால் மென்க்யான் ஹால் ஹிப்பி ர:வானா| ச2ல்னொ மெநெத் காய், கோட்டி ஜனொ மெநெத் காய் அஸ்கிதெனு ஒங்கி3ரீஸ் ஜனொ| ஜித்துரவ் ஜு2க்கு கெஷ்டம்கன் ஜிலேத் ஹொதெஸ்||

ஒண்டெ தி3ன்னு ஒண்டெ தொ3வ்ரி வீத் தொ3ப்3ப3த்தொ ஜ2ண்ணி க2ள்ளி ப4ராட் அவ்ய்யாஸ்| தெல்லெ கெ4ண்டொ வரொ பொ3லம்கன் ஹன்லேத் ஹொதெஸ்| தொ3வ்ரி ஒங்கி3ரி தொ3ப்3ப3த்தொ ஜு2க்கு ஸிரம் கெர்லிடி3யா| தொ3ப்3ப3த்தொ வேள் வரொ அவி ஸவ்ளொ என்குட் தென்குட் ஹுடடேஸ்| தொ3வ்ரிக் ஹிம்ஸொகன் லகெ3ஸ்| வீத் தொ3ப்3ப3த்தெ கீ? ஸவ்ளொ ஸெர்கொ கெர்லத்தெ?

காய் ஹொயெத்தெ கீ? காய் ஹவ்டெயெ கீ -'அரே ஹபாளா! ஒண்டெ காம் கெரத்தொ தூ ஸொட3ரேஸ் கா? காம் கெர்னாஜியெத் முல்லொ(மெள்ளி) காம் க2ள்நாத்தொ ர:வானயா? மொகொ அவரியெ ராகும், அத்தொ தூ உஞ்சொ ஜாஸ் கீ நீ:ஜெத் ஜ2ண்ணி க2ள்ளி ஹநத்தெ?' மெனி மெல்லேத் தொ3வ்ரி ராகும் ஹிப்பி ரா:த்தொ நில்ய்யாஸ்| இக்கொ தி3ன்னு க2ல்லொ ஹொதெ ஹபாள் அத்த்ப் க2ல்லொ நீ:! உஞ்சொ ஜேடி3 ஹொதெஸ்!!

தொ3வ்ரி ஸொந்தோஶ்கன் வீத் தொ3ப்3பி3தி கொ4ம்மொ ஜேட்3யாஸ்||

இஸனீஸ் அமி ஸாரியெ எல்லெ ஹபாள் உஞ்சொ ஜியெத்தெ| தெல்லெ தொ3வ்ரி ஒன்டெ ரா:னஜெத் அத்தொ அமி கோனக் ரீ:ராவ்வெ?

ꢩꢹꢒ꣄ - பூ4க்

ꢡꢿ ꢣꢶꢥ꣄ꢥꢸ ꢲꢹꢥ꣄ ꢗꢵꢜꣁ ꢱꣂꢥ꣄ ꢲꢥ꣄ꢭꢿꢡ꣄ ꢲꣁꢡꢾꢱ꣄꣎ ꢲꢸꢥꢳꣁ ꢲꣁꢫꢾ ꢲꢵꢭ꣄, ꢦꢥꢶ ꢒꢾꢰ꣄ꢜꢪ꣄ ꢪꢾꢳ꣄ꢳꢶ ꢗꢾꢬ꣄ꢭꢶꢞꢶꢫꣁ꣎ ꢡꢿ ꢱꢸꢥꢵꢒ꣄ ꢣꢷ ꢣꢶꢥ꣄ꢥꢸ ꢬꢴꢷ ꢩꢵꢡ꣄ ꢂꢨ꣄ꢨꢸꢥꢵꢡ꣄ꢡꣁ ꢤꢮ꣄ꢬꣁ ꢱꣁꢪ꣄ꢪꢬꢹꢱ꣄ ꢨꢶꢱꢶ ꢲꣁꢡꢾꢱ꣄| ꢦꣂꢜ꣄ ꢂꢱ꣄ꢒꣁ ꢩꢹꢒ꣄; ꢪꣁꢥ꣄ꢥꢸ ꢂꢱ꣄ꢒꣁ ꢩꢵꢡ꣄꣎ ꢬꢴꢶꢫꢾꢡ꣄ ꢪꢾꢳ꣄ꢳꢶ ꢲꢸꢜꢶ ꢙꢷ ꢮꢾꢒ꣄ꢒꢸꢥꣁ ꢪꢾꢥꢶ ꢭꢔꢾꢥꢶ꣎ ꢨꢶꢱꢶꢬꢶ 'ꢩꢹꢒ꣄ ꢩꢹꢒ꣄' ꢪꢾꢥꢶ ꢲꢮ꣄ꢜꢶꢭꢿꢡ꣄ ꢲꣁꢡꢾꢱ꣄꣎

ꢲꢮ꣄ꢜꢥ꣄ ꢩꢹꢒ꣄ ꢙꢮꢞꢫ꣄ ꢒꢵ? ꢡꢾꢭ꣄ꢭꢾ ꢡꢿ ꢱꢸꢥꢵꢒ꣄ ꢒꣁꢥ꣄ꢥꢶ ꢱꢶꢒ꣄ꢒꢞꢶ ꢣꢷꢬꢵꢥꢵꢥ꣄ ꢱꣂꢥ꣄ ꢱꢿ꣎ ꢗꢵꢬ꣄ꢦꢵꢫꢶꢥ꣄ ꢗꢾꢮ꣄ꢣꢸꢥꣁ ꢪꢾꢥꢶ ꢥꢴꢷꢥꢵ꣎ ꢡꢾꢒꣁ ꢲꢵꢳ꣄ ꢒꣁꢥ꣄ꢥꢶ ꢡꢾꢥꢸ ꢱꢶꢒ꣄ꢒꢞꢶ ꢤꢷꢬꢵꢥꢶ꣎꣎

ꢩꢹꢒ꣄ ꢔꣂꢱ꣄ ꢱꣁꢞꢫ꣄ ꢒꢵ? ꢱꢸꢥꢵꢒ꣄ ꢲꢸꢞꢶ ꢲꢶꢨ꣄ꢨꢶ ꢬꢴꢮꢜ꣄ꢜꢶꢫꣁ꣎ ꢩꢵꢡ꣄ ꢓꢵꢥꢵꢙꢶꢫꢾꢡ꣄ ꢪꣁꢬꢠꢹꢱ꣄ ꢪꢾꢥꢶ ꢲꢮ꣄ꢜꢶ ꢮꢷꢢꢸ ꢮꢷꢢꢸ ꢱꢸꢜ꣄ꢜꢸ ꢧꢶꢬ꣄ꢭꢿꢡ꣄ ꢲꣁꢡꢿꢱ꣄꣎ ꢡꢾꢥ꣄ꢣꢹꢣꢷ ꢒꢵꢫ꣄ ꢮꢶꢰꢿꢱ꣄ ꢪꢾꢥꢶ ꢒꢳꢵꢥꢶ꣎ ꢔꢵꢪ꣄ ꢂꢱ꣄ꢒꣁ ꢨꣁꢠꢵꢭ꣄ ꢱꣁꢞ꣄ꢭꢿꢡ꣄ ꢲꣁꢡ꣄ꢫ꣄ꢫꢵꢱ꣄꣎ ꢱꢸꢥꢵꢒ꣄ ꢩꢹꢒ꣄ ꢏꢠ꣄ꢜꢾ ꢦꣁꢒ꣄ꢒꣁ ꢪꢾꢥꢾꢡ꣄, ꢨꣁꢠꢵꢭ꣄ ꢱꢷꢣꢶ ꢤꢵꢒ꣄ ꢏꢠ꣄ꢜꢾ ꢦꣁꢒ꣄ꢒꣁ꣎꣎

ꢏꢠ꣄ꢜꢾ ꢕꣁꢪ꣄ꢪꣁ ꢮꢾꢣꢹꢬ꣄ ꢲꢸꢜ꣄ꢜꣁ ꢦꢵꢥ꣄ ꢲꢸꢱꢶꢬꢶ ꢣꢔꢶ ꢲꣁꢡ꣄ꢫ꣄ꢫꢵꢱ꣄꣎ ꢱꢸꢥꣁ ꢱꣁꢥ꣄ꢡꣂꢰ꣄ꢒꢥ꣄ ꢓꢵꢥ꣄ ꢙꢵꢥ꣄ ꢮꢿꢳꣁ, ꢒꣂꢜ꣄ ꢬꢴꢷ ꢂꢮꢾꢫꢾ ꢪꢾꢥꢶ ꢒꢳꢵꢥꢶ, ꢢꢷꢥ꣄ ꢗꢵꢬ꣄ ꢱꢸꢥꢵꢥ꣄ ꢡꢿꢜ꣄ ꢗꢾꢬ꣄ꢭꢶꢞꢶꢫꢵ꣎ ꢂꢮ꣄ꢬꢾ ꢱꢸꢥꢵꢒ꣄ ꢙꢾꢜꣁ ꢪꢭ꣄ꢭꢶ ꢓꢵꢡ꣄ꢡꣁ ꢨꣁꢭꢪ꣄ ꢥꢴꢷ꣎ ꢣꢸꢱꢶꢬꢾ ꢒꣂꢜ꣄ ꢡꢶ ꢒꢵꢫ꣄ ꢡꢶ ꢂꢨ꣄ꢨꢫ꣄ ꢒꢵ ꢪꢾꢥꢶ ꢮꢾꢒ꣄ꢒꢥ꣄ ꢥꢶꢳ꣄ꢳꢶꢞꢶꢫꣁ꣎꣎

ꢡꢾꢭ꣄ꢭꢾ ꢮꢷꢢꢸ ꢪꢸꢒ꣄ꢒꢸꢬ꣄ ꢱꢿꢡ꣄ꢡꢾ ꢪꢡ꣄ꢡꢶꢪ꣄, ꢏꢠ꣄ꢜꢾ ꢱꢸꢒ꣄ꢒꢾ ꢲꢜ꣄ꢒꢵ ꢒꢸꢜ꣄ꢒꣁ ꢱꢷꢡꢶ ꢱꣁꢥ꣄ꢡꣁꢰ꣄ꢒꢥ꣄ ꢓꢵꢡ꣄ꢡꣁ ꢙꢶꢫꢾꢱ꣄꣎ ꢲꢜ꣄ꢒꣁ ꢗꢮꢡ꣄ꢡꣁ ꢗꢮꢡ꣄ꢡꣁ, ꢡꣂꢠꢸ ꢩꢶꢡ꣄ꢡꢬ꣄ ꢱꢿꢡ꣄ꢡꢾ ꢒꢾꢠ꣄ꢜꣁ ꢧꢜ꣄ꢜꢶ, ꢬꢾꢒꢡ꣄ ꢂꢮꢡ꣄ꢡꣁ ꢥꢶꢳ꣄ꢳꢶꢞꢶꢫꣁ꣎ ꢡꢾꢭ꣄ꢭꢾ ꢬꢾꢒꢡ꣄ ꢲꢜ꣄ꢒꢵꢪ꣄ ꢬꢴꢷ ꢂꢮꢬꢿꢱ꣄ ꢪꢾꢥꢶ ꢲꢮ꣄ꢜꢶ, ꢩꢾꢳꢶ ꢱꣁꢪ꣄ꢦꢸꢒꢥ꣄ ꢓꢵꢡ꣄ꢡꣁ ꢥꢶꢳ꣄ꢳꢶꢞꢶꢫꣁ ꢡꢾꢭ꣄ꢭꢾ ꢱꢸꢥꣁ꣎꣎

தே தி3ன்னு ஹூன் சாடொ ஸோன் ஹன்லேத் ஹொதெஸ்| ஹுனளொ ஹொயெ ஹால், பனி கெஷ்டம் மெள்ளி செர்லிடி3யொ| தே ஸுனாக் தீ3 தி3ன்னு ரீ: பா4த் அப்3பு3நாத்தொ த4வ்ரொ ஸொம்மரூஸ் பி3ஸி ஹொதெஸ்| போட் அஸ்கொ பூ4க்; மொன்னு அஸ்கொ பா4த்| ரி:யெத் மெள்ளி ஹுடி ஜீ வெக்குனொ மெனி லகெ3னி| பி3ஸிரி 'பூ4க் பூ4க்' மெனி ஹவ்டிலேத் ஹொதெஸ்|

ஹவ்டன் பூ4க் ஜவட3ய் கா? தெல்லெ தே ஸுனாக் கொன்னி ஸிக்கடி3 தீ3ரானான் ஸோன் ஸே| சார்பாயின் செவ்து3னொ மெனி நீ:னா| தெகொ ஹாள் கொன்னி தெனு ஸிக்கடி3 தீ4ரானி||

பூ4க் கோ3ஸ் ஸொட3ய் கா? ஸுனாக் ஹுடி3 ஹிப்3பி3 ர:வட்டியொ| பா4த் கா2னாஜியெத் மொரணூஸ் மெனி ஹவ்டி வீது2 வீது2 ஸுட்டு பி2ர்லேத் ஹொதேஸ்| தெந்தூ3தீ3 காய் விஷேஸ் மெனி களானி| கா3ம் அஸ்கொ பொ3ணால் ஸொட்3லேத் ஹொத்ய்யாஸ்| ஸுனாக் பூ4க் ஒண்டெ பொக்கொ மெநெத், பொ3ணால் ஸீதி3 தா4க் ஒண்டெ பொக்கொ||

ஒண்டெ கொ4ம்மொ வெதூ3ர் ஹுட்டொ பான் ஹுஸிரி த3கி3 ஹொத்ய்யாஸ்| ஸுனொ ஸொந்தோஷ்கன் கா2ன் ஜான் வேளொ, கோட் ரீ: அவெயெ மெனி களானி, தீ2ன் சார் ஸுனான் தேட் செர்லிடி3யா| அவ்ரெ ஸுனாக் ஜெடொ மல்லி கா2த்தொ பொ3லம் நீ:| து3ஸிரெ கோட் தி காய் தி அப்3ப3ய் கா மெனி வெக்கன் நிள்ளிடி3யொ||

தெல்லெ வீது2 முக்குர் ஸேத்தெ மத்திம், ஒண்டெ ஸுக்கெ ஹட்கா குட்கொ ஸீதி ஸொந்தொஷ்கன் கா2த்தொ ஜியெஸ்| ஹட்கொ சவத்தொ சவத்தொ, தோணு பி4த்தர் ஸேத்தெ கெண்டொ ப2ட்டி, ரெகத் அவத்தொ நிள்ளிடி3யொ| தெல்லெ ரெகத் ஹட்காம் ரீ: அவரேஸ் மெனி ஹவ்டி, பெ4ளி ஸொம்புகன் கா2த்தொ நிள்ளிடி3யொ தெல்லெ ஸுனொ||