ꢲꢶꢥ꣄ꢡꣁ ꢏꢠ꣄ꢜꢾ ꢔꢷꢢ꣄ ꢎꢒꢶꢭꢿꢡ꣄ ꢏꢡꢾꢡ꣄ꢡꢾ꣎ ꢡꢾꢭ꣄ꢭꢾ ꢗꢶꢡ꣄ꢡꢶꢬꢪ꣄ ꢦꢿꢱꢸꢣꢞꢶ ꢪꢾꢥꢬꢶꢫꢾ ꢡꢪꢶꢳ꣄ ꢦꢞꢪꢸꢪ꣄ ꢂꢮꢬꢶꢫꢾ 'ꢪꢳꣀ ꢪꢳꣀ' ꢪꢾꢥꢬꢶꢫꢾ ꢔꢷꢢ꣄꣎ ꢔꢷꢢꢸ ꢪ꣄ ꢏꢠ꣄ꢜꢾ ꢮꢡ꣄ꢡꣁ ꢧꢶꢬꢶ ꢧꢶꢬꢶ ꢂꢮꢬꢿꢱ꣄ - 'ꢮꣂꢮ꣄ ꢮꣂꢮ꣄...ꢮꣂꢮ꣄ ꢮꣂꢮ꣄' ꢪꢾꢥꢶ꣎ ꢬꢸꢮ꣄ꢮꣁ ꢲꢮ꣄ꢜꢶ ꢱꢶꢫꢾꢡ꣄ ꢮꣂꢮ꣄ ꢪꢾꢥꢬꢶꢫꢾ ꢡꢪꢶꢳ꣄ ꢮꢡ꣄ꢡꣁ ꢥꢵ; ꢡꢪꢶꢳꢸꢪ꣄ 'ꢫꣂꢮ꣄' ꢪꢾꢥꢶ ꢱꢿ; ꢱꢸꢥꣁ ꢆꢱ꣄ꢒꢬꢶꢫꢾꢒꣁ 'ꢮꣁꢮ꣄ ꢮꣁꢮ꣄' ꢪꢾꢥꢶ ꢪꢾꢥꢥ꣄ ꢪꢾꢥꢬꢶꢫꢾ ꢒꢳꢥꢶ ꢦꣁꢞꢫ꣄꣎ ꢮꣂꢮ꣄ ꢮꣂꢮ꣄ ꢪꢾꢥꢶ ꢡꢪꢶꢳꢸꢪ꣄ ꢙꢸꢥ꣄ꢥꢵ꣎
'ꢧꣁꢬꢶꢖ꣄ꢔꢶ ꢮꢡ꣄ꢡꢵꢪ꣄'(English) ꢬꢴꢵꢫ꣄ ꢒꢵ ꢪꢾꢥꢶ ꢱꢶꢫꢾꢡ꣄, ꢡꢾꢭ꣄ꢭꢾꢪꣁ ꢪꢾꢳ꣄ꢳꢶ ꢥꢴꢷ; ꢮꢵꢮ꣄(wow) ꢪꢾꢥꢷꢱ꣄ ꢱꢿ ꢙꢡꣁ, ꢮꣂꢮ꣄ ꢪꢾꢥꢶ ꢥꢴꢷ; ꢪꢾꢫ꣄ꢒꢶ, ꢮꣂꢮ꣄ ꢪꢾꢥꢬꢶꢫꢾ ꢒꣂꢜ꣄ ꢬꢴꢷ ꢂꢮ꣄ꢬꢵꢫ꣄ ꢪꢾꢥꢶ ꢦꢸꢱꢾꢡꢶ, ꢱꣃꢬꢵꢰ꣄ꢜ꣄ꢬꢪ꣄ ꢡꢾꢭ꣄ꢭꢾꢒꣁ ꢨꣁꢣꢸꢭ꣄ ꢣꢿꢬꢾꢱ꣄꣎꣎
ꢏꢠ꣄ꢜꢾ ꢨꢾꢜ꣄ꢒꣁ ꢙꣁꢮꢭ꣄ ꢮꢡ꣄ꢡꣁ ꢒꢾꢬꢡ꣄ꢡꣁ ꢮꢿꢳ꣄ - 'ꢬꢿ(ꢫ꣄)! ꢒꢵꢫ꣄ ꢒꢾꢬꢬꢾꢡ꣄ꢡꢾ' ꢪꢾꢥꢶ ꢪꢾꢥꢸꢮꢿ꣎ ꢡꢾꢭ꣄ꢭꢿꢱ꣄ ꢏꢠ꣄ꢜꢾ ꢨꢾꢜ꣄ꢒꢶ ꢪꢾꢥꢾꢡ꣄ - 'ꢮꣂꢮ꣄ ꢒꢵꢫ꣄ ꢒꢾꢬꢬꢶꢡ꣄ꢡꢶ' ꢪꢾꢥꢶ ꢪꢾꢥꢸꢮꢿ꣎ ꢡꢾꢒꣁ ꢲꢵꢭ꣄, ꢗꢶꢡ꣄ꢡꢶꢬꢪ꣄ ꢦꢿꢱꢸꢣꢞꢶꢪ꣄ ꢔꢷꢢ꣄ ꢭꢶꢒ꣄ꢒ꣄ꢫ꣄ꢫꢵꢡ꣄ꢡꢾꢥ꣄ꢒꣁ, ꢱꣃꢬꢵꢰ꣄ꢜ꣄ꢬꢪ꣄ ꢒꢳꢫꢷꢱ꣄ ꢬꢴꢥꣁ ꢪꢾꢥꢶ ꢲꢮ꣄ꢜꢸꢮꢵꢫ꣄; ꢥꢴꢷꢥꢵ ꢙꢶꢫꢾꢡ꣄, ꢡꢾꢥꢸ ꢒꣂꢥꢒ꣄ ꢮꣂꢮ꣄ ꢪꢾꢥꢬꢶꢫꢾ ꢮꢡ꣄ꢡꣁ ꢔꢷꢢꢸꢪ꣄ ꢂꢥ꣄ꢬꢴꢵꢥ꣄?
ꢡꢸꢪꢶ ꢪꢾꢳ꣄ꢳꢶ ꢲꢮ꣄ꢜꢶ ꢱꢶꢫꢾꢡ꣄, ꢬꢸꢮ꣄ꢮꣁꢬꢸꢮ꣄ꢮꣁ ꢪꢷ ꢱꢖ꣄ꢔꢬꢶꢫꢾ ꢱꢾꢬ꣄ꢒꣁ ꢪꢾꢥꢶ ꢪꢾꢥꢥ꣄꣎
ꢥꢴꢥ꣄ꢥꣁ ꢄꢮꢬ꣄: ꢌꢭ꣄ꢭꢾ ꢔꣂꢫꢵꢨꢭ꣄ꢱ꣄ ꢡꢶꢫꢬꢶ ꢃꢣꢵꢬ꣄ꢒꢥ꣄ ꢢꣁꢮ꣄ꢭꢶ ꢭꢶꢒ꣄ꢒꢾꢫꢾ꣎
ஹிந்தொ ஒண்டெ கீ3த்2 ஐகிலேத் ஒதெத்தெ. தெல்லெ சித்திரம் பேஸுத3டி3 மெனரியெ தமிழ் பட3மும் அவரியெ 'மழை மழை' மெனரியெ கீ3த்2. கீ3து2 ம் ஒண்டெ வத்தொ பி2ரி பி2ரி அவரேஸ் - 'வோவ் வோவ்...வோவ் வோவ்' மெனி. ருவ்வொ ஹவ்டி ஸியெத் வோவ் மெனரியெ தமிழ் வத்தொ நா; தமிழும் 'யோவ்' மெனி ஸே; ஸுனொ உஸ்கரியெகொ 'வொவ் வொவ்' மெனி மெனன் மெனரியெ களனி பொட3ய். வோவ் வோவ் மெனி தமிழும் ஜுன்னா.
'பொ2ரிங்கி3 வத்தாம்'(English) ரா:ய் கா மெனி ஸியெத், தெல்லெமொ மெள்ளி நீ:; வாவ்(wow) மெனீஸ் ஸே ஜதொ, வோவ் மெனி நீ:; மெய்கி, வோவ் மெனரியெ கோட் ரீ: அவ்ராய் மெனி புஸெதி, ஸௌராஷ்ட்ரம் தெல்லெகொ பொ3து3ல் தே3ரெஸ்
ஒண்டெ பெ3ட்கொ ஜொவல் வத்தொ கெரத்தொ வேள் - 'ரே(ய்)! காய் கெரரெத்தெ' மெனி மெனுவே. தெல்லேஸ் ஒண்டெ பெ3ட்கி மெநெத் - 'வோவ் காய் கெரரித்தி' மெனி மெனுவே. தெகொ ஹால், சித்திரம் பேஸுத3டி3ம் கீ3த்2 லிக்க்ய்யாத்தென்கொ, ஸௌராஷ்ட்ரம் களயீஸ் ர:னொ மெனி ஹவ்டுவாய்; நீ:னா ஜியெத், தெனு கோனக் வோவ் மெனரியெ வத்தொ கீ3து2ம் அன்ரா:ன்?
துமி மெள்ளி ஹவ்டி ஸியெத், ருவ்வொருவ்வொ மீ ஸங்க3ரியெ ஸெர்கொ மெனி மெனன்.
ந:ன்னொ இவர்: எல்லெ கோ3யாப3ல்ஸ் தியரி ஆதா3ர்கன் தொ2வ்லி லிக்கெயெ.
